ياليل ياليل العنى والبهاذيل=سلبت من عين الشقاوي نظرها
ياليل قل لام الرموش المظاليل=والا انت تكفى قلنا وش خبرها
ياليل هي تدري عن الحال ياليل=هو..بيدها ولا زمنها قهرها
ياليل علمها ترى..مابقا حيل=روح المغربل لاتحمل وزرها
ماتشوف شوقٍ له اضلوعي مداهيل=يهزني هز..الرياح لشجرها
يسوقني سوق الهوى..للهماليل=حره معاليق الظماير سعرها
لا اتلى العهد بمصافحي نافل الجيل=قبل الزمن ياليل يخلف قدرها
يوم انها كانت تجي للتعاليل=تسمر معي واحيا واموت بسهرها
اشوفها في كيل والخلق في كيل=ياحلوها بعيون من ينتظرها
يازينها لا جت كما باهظ الليل=مثل القمر والليل كنه شعرها
كن العقود بصدرها الجدي وسهيل=كن الثريا..ترتقص في نحرها
ياهل الهوى..سوت بقلبي تهاويل=روح العليل بكفها تحتضرها
موتٍ حمر..عنقا بعيدة مناويل=ياكبر هم اللي وقع في قدرها
تطرق مسالك قاطعات المواصيل=وتنثر على خد المغربل اعبرها
تبدي مواويلٍ وتكما..مواويل=وتعزف على موج المشاعر وترها
ذقت العنى من همها والغرابيل=يالوعة المشتاق طوّل سفرها
والله والله مابقا..للحمل شيل=ياليل قلي لامتى وانتظرها