كتبت الشعر مو لجلك ولكن فاض بي بركان=وأما انتي فلا تسوي قصيدة في نظر عيني
حلفتيلي تصونيني إذا صار الزمن خوان=وأول ما عثر حظي على دربك خذلتيني
كسر رمح الزمن صدري وجيتك اشتكي حيران=نزعتي الرمح من صدري وفي ظهري طعنتيني
خسارة كيف حبيتك نعم والله أنا ندمان=غبي ادري نعم ادري ما دام أنك سكنتيني
ثلاث سنين من عمري وأنا في لعبتك غرقان=أشيل الشوك من دربك وجرحي كان يدميني
وكنت أبكي إذا تبكي وأكون لبسمتك فرحان=وكنت أقرب من رموشك لعينك يوم تبغيني
عرفتك للأسف صحرا وحولتك إلى بستان=وشلتيني غصن اخضر وفي صخرك زرعتيني
حفرتك داخلي ظني تصوني عشرتي أزمان=وكنت أحفر قبر موتي على ساحل شراييني
على كف الشقا نامت جروحي والألم سهران=يحطمني يبعثرني وفي صحراك يرميني
ولكن عزتي تفرض أكون بدنيتي سلطان=وإن ظنك أجي أركع لرجلك ما عرفتيني
أنا ما عادتي أشحت من امْثالك رضا وإحسان =أموت بعزتي أرحم ولا ذلك يغطيني
وما دام الوفاء عندك يدور له على عنوان=بدور لي على قلب يصون الحب وسنيني
ولو قلبي ذكر حبك باولع فيه بالنيران=وبكسرها أنا رجلي إذا صوبك توديني
ولو دار الزمن ضدك وجيتي تطلبي الغفران =وجبتي الشمس في كفك لعندي .. ما بتلقيني
تقول الناس في وصفـك : جميله مثل عـود البان=وإنك أجمل وأحلى بشـر مخلوق من طـيني
وإنك غالية وأثمن من الياقـوت والمرجان =تقوم أكوان من شانك وتقعد لك بلاديني
حساااافة غـرّهم شكلك، ويا ما تخدع الألوان=عموما.. قد بقت كلمة أخيرة لك وسِـمعيني
إذا كنتي بنظر غيري ملاكٍ فــي شكل إنسان=قسم بالله ما تسوي قصيدة في نظر عيني ؛