يا هيه يا اللي تعذل القلبْ خليّهْ=وش لك على اللّي في هوى الغيد محياهْ
ما تكتمْ من الشوق العين تبديهْ=خلها لربٍ ساجمٍ في عطاياه
ولّع بقلبي جمرْ مَحدٍ يطفّيهْ=يفز نبضي حين تضحك ثناياهْ
أبات طول الليل ساهرْ أناجيهْ=يا ما حلا التسهاد مع حلو نجواهْ
وينام ملوا العين ، ليته يغطّيه=رمشي، وينساني زماني وينساهْ
يآمر و ينهي، والحكي فيه ما فيهْ=والقلب يبغي، لكن النفس تنهاهْ
حلو الملامح وافي الزين أفديهْ=من كل نسمةْ لو تحاول تعدّاهْ
يوعد ولا يوفي ، من عادةٍ فيهْ=ويقول باكر، وأمس الأول نسيناهْ
و يصدّ عني يحسب إني أجافيهْ=ما من زعلْ لكن يريدن أرضّاهْ
لو مرةٍ يصدق بوعدٍ بيعطيهْ=أعطيه قلبٍ لو يبيعه شريناهْ
والله يوم يعن عالبال طاريهْ=أغدي كما اللي طعنة الرمح تنصاهْ
لي ظاق صدري من هواجيسْ ترميهْ=وغابت عليَّ الشمس ، قابلت ذكراهْ
يحكي معي طيفهْ، وآنا أحاكيهْ=وعن الحسد عيني من العين ترقاهْ
مالي ونيسٍ غير رقة معانيهْ=وآهيم به من ترمي القلب عيناهْ
جزل القوافي دوم أسطّرْ ، وأهديهْ=يقرا و أذوب ببسمةٍ من حلاياهْ
وإن لامس إيدي تضيع روحي بمراسيهْ=و أريد أصبر لكن الصبر ما أقواهْ
جرحه بقلبي ما أحاول أداويهْ=لو يطعن بيمناه درته ليسراهْ
خابرتهْ مرةْ وقلت يا الله تهديهْ=ودي أشوفه لو ثواني وأحرّاهْ
جاوب: هلا، والصمت لحنٍ أغنيهْ=وفاح الأريج بخاطري ما يعدّاهْ
حاولت أتكلم وأقول له هلا بيهْ=وألفيت صوتي ضايعٍ في محيّاهْ
يا عين حذرك والدمع، لا تهلّيهْ=والذيب ما يبكي إن فاته معشّاهْ